BR LA UNION – Tarigagay ni Presidente Ferdinand Marcos Jr. a maaddaan ti significant changes wenno panagbalbaliw iti biag dagiti Pilipino sakbay a bumaba iti puwesto inton 2028, isutgapuna a kayatna a nagaget ti gabinetena a mangipatungpal kadagiti proyekto ken programa ti gobiyerno.
Iti podcast interview kenni Presidente Marcos, kinunana a tallo laengen a tawen ti nabati iti termino na, isunga saan na a kayat ti business as usual, nangruna ket adu dagiti problema a tamingen.
Impaganetget ti Presidente a napateg nga agbalin a napinget ti gobierno a mangragpat iti target on time.
Saan laeng nga iti panangtungpal kadagiti dadakkel a legacy projects, transportation ken agricultural projects.
Mangnamnama met ti Presidente a saan nga agsagaba dagiti umili, isunga mataming ti aniaman a kasapulan a matarimaan.
Impaganetget ti Presidente a napateg ti agbalin nga istrikto nangruna no nakataya ti pagsayaatan dagiti umili.
Kinuna ti Presidente a ti panangipaay iti serbisiyo publiko ket saan a maipapan iti gayyem.
Inbatad na nga uray gayyem na ti opisyal, no saan met a performing ket talaga nga ikkaten na iti posisyon.
Kabayatanna, agtultuloy ti panagkiddaw ni Presidente Marcos iti accountability kadagiti government official gaputa saan nga agpatingga iti pannakaileppas dagiti proyekto ken programa iti trabaho dagiti opisyal ti gobierno.
Daytoy met segun iti presidente ti rason no apay a personal a bisitaenna ti tunggal proyekto a maipatpatungpal.
Inbinglay ti Presidente nga adda dagiti panawen a naiduma ti linaon ti report wenno ti pannakaipatungpal dagiti proyekto maibasar iti report a dumanon iti opisinana, no ikumpara iti aktual a resulta.
Kayatna a sawen, a nabola wenno naallilaw isuna ti sumagmamano nga opisyal.
Daytoy ti gapuna a kayatna a makita a mismo dagiti nalpas a programa.
Impasigurado ti Presidente a manipud ita, tunggal proyekto, bassit man wenno dakkel, a rumbeng a makita ti publiko, ket maileppas iti naikeddeng a deadline, ken rumbeng a marepaso, wenno mataginayon.
