LA UNION – Indaulwan ni President Ferdinand Marcos Jr. iti panangsukimat iti gakat a 2025 national budget.
Daytoy ket kalpasan a tinaripnong ni Pres. Ferdinand Marcos Jr. iti economic managers agraman ni Executive Secretary Lucas Bersamin.
Maibasar iti ladawan nga impatulod ti Presidential Communications Office (PCO) makita nga agsasango iti maysa a long table idiay Malakanyang da President Marcos kadwa na da Budget Secretary Amenah Pangandaman, Finance Sec. Ralph Recto, DPWH Sec. Manuel Bonoan ken NEDA Sec. Arsenio Balisacan.
Immunan nga imbaga ni Bersamin nga adda dagiti line item ken probisyon ti national budget bill iti i-veto ni President Marcos, para iti pagimbagan dagiti Pilipino, ket maiyannurot iti fiscal policy ken iti linteg.
Aganay P6.352 trilyon a pisos iti gakat a national budget para iti sumaruno a tawen.
Immunan nga inwaragawag ni Bersamin a saan a matuloy iti December 20,2024 a panangpirma ti Presidente iti national budget.
Saan metten nga imbaga ti Malakanyang nu kaatnu a mapasingkedan iti General Appropriations Bill.
