Kinumpirma ti Philippine Coast Guard (PCG) a mangideploy da kadagiti technical divers tapno mangisayangkat ti search and retrieval operation idiay Taal Lake, Batangas a mapapati a nangibellengan kadagiti bagi dagiti 34 a mapukpukaw a mammallot.
Segun kenni PCG Commandant Admiral Ronnie Gil Gavan, binilin na ti Coast Guard Special Operations Force (CGSOF) a makikoordinar iti Department of Justice (DOJ), National Bureau of Investigation (NBI), ken Philippine Navy (PN) para ti madagdagos a pannakaipatulod kadagiti divers tapno pasingkedan ti rebelasyon a naibelleng idiay Taal Lake ti bagi dagiti biktima.
“If the DOJ needs the expertise of our men and women to confirm or reject this piece of information as part of the case build-up, we will be there,” kinuna ni Gavan.
Maipalagip a ti addang ket kasaruno ti waragawag ti maysa whistleblower a nangibutaktak ti baro nga impormasyon iti kaso. Kinuna daitoy a saan laeng a 34 nu di ket nasursurok pay ngem sangagasot dagiti napapatay a mammallot gapo iti panag-katyor da. Napukaw dagiti biktima ti nagbaetan ti Abril 2021 agingga Enero 2022 manipud kadagiti nagduduma a lugar idiay Laguna, Batangas, Maynila, ken Bulacan.
Kabayatanna, agtultuloy met a kumidkiddaw ti pamilya dagiti biktima iti hustisya tapno malag-ananen ti karirikna da iti agingga uppat a tawen a bangungot.
