LA UNION – Agtinnulong ti Presidential Commission for the Urban Poor (PCUP) ken ti Philippine Statistics Authority (PSA) tapno mapapartak ti pannakaipaay dagiti dokumento ti civil registry, panagrehistro, ken dadduma pay a serbisio kadagiti marigrigat.
Umuna, nagpirma dagiti dua nga ahensia iti memorandum of agreement kas panagkumit a mangpapartak iti serbisio para kadagiti napanglaw a kasapulan nasao a dokumento.
Babaen ti katulagan, mangipaay ti PCUP iti maitutop a logistics support, venue, ken equipment a mangsuporta kadagiti programa ti PSA para kadagiti marigrigat.
Iti biang ti PSA, mangipaay daytoy iti teknikal a tulong kadagiti programa ti PCUP.
Segun iti PSA, nakasagana daytoy a mangipaay iti tulong tapno agserbi kadagiti adda iti vulnerable sector ken masigurado a masalakniban ti kinasiasinoda manipud pannakayanak agingga iti ipapatay.
Epektibo ti nasao a katulagan iti uppat a tawen (2024-2027) ken maipaulog iti mandatory review sakbay ti pannaka-renew daytoi.
Iti kasta a panangrepaso, maikeddeng dagiti kasapulan a panagbalbaliw, ken panagrang-ay ti serbisio.
