BR LA UNION – Siniguro ti Department of Social Welfare and Development iti sibubukel a suporta da iti peace agenda ni Presidente Ferdinand Marcos Jr.
Mainaig ti daytoy ket rinugyanen ti ahensya iti verification ken profiling activity ken panangipaay ti tulong pinansyal kadagiti benepisyaryo manipud Moro National Liberation Front (MNLF) idiay probinsya ti Sulu.
Daytoy ket maiyannurot iti direktiba ni President Marcos a paset ti peace agreement ti gobyerno iti MNLF.
Maibasar iti datos ti ahensya, umabot iti pakabuklan a 518 MNLF combatants iti posible a makipaset iti profiling activity.
Tunggal benepisyaryo ket umawat ti ₱45,000 iti sidong ti Bangsamoro Transitory Family Support Package.
Inlawlawag ti ahensya a ti nasao nga inisyatiba ket suporta ti gobyerno para iti tarigagay a nakapya a biag dagiti sibilyan ken makatulong daytoy iti panagbalbaliw da iti biag.
