Balligi a nai-turnover ti Multi-Purpose Vehicles para kadagiti amin a barangay ti ili ti Luna La, Union idi laeng kallabes nga aldaw ita metlaeng a bulan ti Setyembre.
Ti nasao a turnover ceremony ti Provincial Government of La Union ket indauloan ni Governor Mario Ortega a nagkuna a dagitoy a maipaay a lugan ket “additional blessings” para kadagiti residente ti Luna.
Pinaregta ni Governor Mario dagiti umili nga annadan ken imintinir dagitoy a baro a lugan ken saan a baybay-an a siasino lattan iti agmaneho.
Iti sabali a bangir, impakaasi na met kadagiti naikkan a barangay a saan nga umapal nu adda dagiti makita da manipud sabali nga ili a namaymayat ti naited a lugan da.
Inyarig ti Gobernador dagiti kabantayan nga ili ti probinsya a maikkan kadagiti 4×4 a barangay patrols ken innayon a maibagay iti lokasyon ti ipaay ti gobierno a lugan pambarangay.
Kabayatanna, nagyaman met ti Presidente ti Liga ng mga Barangay a ni Ma’am Allyza Villaen para kadagitoy a baro a lugan ken kinunana a dakkel a tulong dagitoy tapno lalo pay a mapapartak ti panagresponde, partikular kadagiti residente nga agkasapulan ti madagdagos nga atensyon-medikal.
Dagiti multi-purpose vehicles ket naglaon ti stretcher, first aid kit, ken oxygen tank a kritikal maipapan ti panagresponde ti emerhensiya ken dadduma pay a trabaho dagiti opisyales ti barangay.
