Aminado ti Department of Energy (DOE) a dumanon ti dekada wenno 10 agingga 15 a tawen sakbay a makarugi ti Pilipinas a makapartuat ti langis ken gas manipud ti oil reserves nga adda sadiay Bangsamoro Autonomous Region in Muslim Mindanao (BARMM).
Idi tawen 2024 ket nangrugin nga umawat ti DOE kadagiti bid para ti petroleum exploration kadagiti tallo a lugar sadiay Cotabato ken Sulu Basins.
Segun kenni DOE Director Rino Abad, marugianen dagiti kontrata para kadagiti proyekto idiay Mindanao, partikular kadagiti lugar a direkta a nakasango idiay Malaysia ken Indonesia.
Kinuna ni Abad a madanon pay ti lima a tawen para ti exploration phase ken kanayonan pay a lima a tawen para ti development sakbay a mangrugi ti produksyon.
Kabayatan a maur-uray daitoy a proyekto, agpanpanunoten ti gobierno kadagiti temporario a solusyon kas iti fuel subsidies tapno masungbatan ti pagkasapulan ti enerhiya.
Iti sabali a bangir ket inyanunsyo met ti Bangsamoro government ti plano da nga ag-explore ti coal sa diay Kapai ken Tagoloan idiay Lanao del Sur nga addan ti pakabuklan nga 14,856 ektarya a kalawa.
