Rinugianen ti pagilian a Pilipinas ken France ti panangdakamat maipanggep ti Visiting Forces Agreement (VFA) sadiay Paris ita a lawas.
Ti umuna a paset ti negosasyon para iti katulagan ket manamnama a makaipaay ti dalan para ti agpada a pagilian a makaisayangkat kadagiti joint military exercises iti teritorio ti tunggal maysa.
Segun kenni French Ambassador Marie Fontanel-Lassalle, nupay naballigi ti nagbalin a panagtataripnong ket posible mabayagan ti proseso gapo iti ‘nature’ iti negosasyon.
Inwaragawag iti French Ambassador nga apaman agtungpal iti panagperma ti nasao a katulagan ket iti pagilian a France ti kaunaanen a European country a maaddaan iti VFA ditoy Pilipinas.
Iti agdama ket addaan iti PH ti VFA iti nabayagen a kaalyado nga Estados Unidos a napermaan idi pay tawen 1999 kasta met iti Australia a naratipikaran idi tawen 2012.
Kabayatanna, nagperma met idi napalabas a tawen ti Pilipinas para ti Reciprocal Access Agreement (RAA) iti Japan a nagbalin nga epektibo idi kallabes gapo iti pannakaratipikar na. Mainayon iti dayta ket ti VFA iti New Zealand idi laeng bulan ti Abril kasta met iti kapada a negosasyon para iti pagilian a Canada.
