Naballigi nga insayangkat ti Armed Forces of the Philippines (AFP) ken Japan Maritime Self-Defense Force (JMSDF) ti maikadua a Bilateral Maritime Cooperative Activity idiay West Philippine Sea.
Maysa daitoy iti umuna kadagiti major joint activities kasaruno ti nabiit pay a panagratipika ti Reciprocal Access Agreement (RAA) ti nagbaetan ti Pilipinas ken Japan.
Nakipaset met ti nasao nga aktibidad dagiti assets ti Pilipinas, pakairamanan ti BRP Miguel Malvar, AW159 anti-submarine helicopter, PAF C-208 ISR aircraft, ken Search and Rescue units bayat nga indineploy met ti Japan ti JS Takanami (DD110) ken SH-60K Seahawk helicopter a nangipakita ti joint capability kadagiti nalawa a serye ti naval operations.
Naisayangkat babaen ti aktibidad ti communication check exercise, anti-submarine warfare exercise, cross-deck exercise, Division Tactics and Officer of the Watch Maneuvers (DIVTACS/OOW), Photo Exercises (PHOTOEX), ken Finish Exercise (FINEX), a nangipamatmat ti seamless interoperability ti nagbaetan dagiti dua a puersa.
Kinuna ti AFP a nasursurok pay ngem iti maritime drill daitoy nu di ket naipaganetget pay ti maritime cooperative activity ti pannakaipatungpal ti RAA, maysa a katulagan a panggep a mapapigsa pay ti joint training, humanitarian assistance and disaster response (HADR) initiatives ti nagbaetan ti AFP ken JSDF.
Kabayatanna, inwaragawag ni AFP Chief of Staff General Romeo Brawner Jr. a ti cooperative activity ket saan laeng a maritime activity nu ketdi ket panangipakita pay a saan a mapukaw ti sapata da kadagiti Pilipino para iti kinakapia ken rules-based order ditoy Indo-Pacific Region.
