Pinaglibakan ti Philippine Navy (PN) ti naipadamag a maritime patrol ti Chinese navy ken coast guard sadiay Scarborough shoal a maawagan pay kas Bajo de Masinloc wenno Panatag shoal idiay West Philippine Sea (WPS) ita a Mayo 31.
Segun kenni PN spokesperson for the WPS Rear Admiral Roy Vincent Trinidad, maibasar ti monitoring ti Armed Forces of the Philippines ken PN sadiay WPS karaman dagiti sovereign waters idiay Bajo de Masinloc ken masakupan pay ti 200 nautical miles ti exclusive economic zone ti PH ket awan ti aniaman a napaliiw nga aktibidad manipud Southern Theater Command ti People’s Liberation Army wenno ti China Coast Guard.
Nupay kasta, pinasingkedan met ti PN ti presensiya dagiti dua a barko ti China Coast Guard ken innem a maritime militia vessels sadiay Bajo de Masinloc.
Adda pay dagiti uppat a bangka manipud met Vietnam kasta met dagiti tallo a fishing vessels manipud Taiwan.
Impaganetget manen ti PN official a ti kastoy a claim ket paset ti information-shaping operations ti Chinese Communist Party tapno masungbatan ti aniaman nga internal dissent wenno makaaramid ti international discourse a oumabor kadakuada.
Laksid iti daitoy ket itultuloy latta ti PN ken AFP ti panagbantay ken panangsalaknib ti maritime domain ti pagilian ken agtaltalinaed da a committed ti panagpatalinaed ti kinakapia ken stabilidad ti rehiyon.
Inaramid ti PN ti waragawag kalpasan nga impadamag ti Chinese media ti panagnisayangkat da ti combat readiness patrol ti kabaybayan ken tangatang ti Scarborough shoal nga aw-awagan da kas Huangyan Dao.
Kinunada nga insayangkat daitoy ti Southern theater navy command para ti panangpapigsa ti patrol ken alert operations ti nasao a teritorio.
