BR LA UNION – Nangisayangkat ti joint air patrols ken intercept training iti Philippine Air Force (PAF) ken US Air Force idiay West Philippine Sea idi kalman, Martes tapno papigsaen iti koordinasyon ken air domain awareness.
Dua nga FA-50 fighter jets ti Philippine Air Force ken dua nga US B1-B bombers ti nakipaset iti panagsanay, a naisayangkat iti laud a paset ti kabaybayan ti Pilipinas.
Segun kenni PAF spokesperson Col. Ma. Consuelo Castillo, iti bombers ket naggapo iti asideg a pagilian ngem saan a simmanglad ditoy pagilian.
Kabilang iti ruta ti patrol iti Bajo de Masinloc, a paset ti exclusive economic zone (EEZ) ti Pilipinas ngem kontrolado ti China sipud pay idi 2012.
Nupay saan a namnamaen iti posible a karit manipud kadagiti gangannaet a lugan pangtangatang, siniguro ti PAF a ti operasyon ket maiyannurot iti international rules-based order.
Impaganetget pay ni Castillo a ti nasao a panagsanay ket paset ti regular a drills ken saan a direkta a konektado iti tensiyon iti rehiyon gaputi presensya dagiti barko ti China.
