Imbilin ni Speaker Ferdinand Martin Romualdez iti Kamara ti panangisayangkat ti nauneg nga imbestigasion iti pannakairaman iti nagduduma a krimen dagiti illehitimo a Philippine Offshore Gaming Operators (POGO).
Segun kenni Romualdez, maayaban ti nagduduma a stakeholders, law enforcement agencies, regulatory bodies, ken community representatives iti imbestigasyon tapno makaurnong ti komprehensibo a perspektibo ken rekomendasyon.
Madanagan ni Romualdez iti agtultuloy nga operasion dagiti illegal a Philippine Offshore Gaming Operators iti laksid dagiti nainget a pagannurotan a maipatpatungpal ditoy pagilian.
Mangnamnama ni Romualdez a babaen ti imbestigasion, maluktan ti maskara dagiti mastermind ken protektor dagiti illegal a POGO a karaman kadagiti illegal nga aktibidad.
Kabayatan ti hearing, kayat met a maammuan ni Romualdez no epektibo pay laeng ti agdama a regulasion ken no ania ti rason wenno kasano a kabaelan dagiti illegal a POGO a liklikan ti linteg.
