Inyebkas ti Commission on Filipinos Overseas (CFO) ti nainget a panangkondenarda iti pannakapapatay ti 27-anyos a Filipina a ni Marvil Facturan-Kocjančič, babaen iti social media post idi kalman, aldaw ti Biernes, Enero 10, 2025.
Segun kadagiti report, ni Facturan-Kocjančič ket pinatay ti lakayna a ni Mitja Kocjančič bayat ti panagbakasionda idiay Bled, Slovenia idi Disiembre 29, 2024.
Impaganetget ti Commission on Filipinos Overseas ti agtultuloy a suportada iti karbengan ken kinatalged dagiti Pilipino iti ballasiw-taaw ken paregtaenda dagiti makapaspasar iti domestic violence wenno dadduma pay a klase ti panangabuso nga agpatulong tapno masuportaran.
Ipakita ti nakalkaldaang a pasamak ti agtultuloy a panagkasapulan iti panangipaay iti proteksion ken suporta kadagiti Pilipino nga agnanaed sadiay ballasiw-taaw.
