Agtultuloy a mapasaran ti Pilipinas ti La Niña-like conditions agingga iti bulan ti Marso segun iti Philippine Atmospheric, Geophysical and Astronomical Services Administration (PAGASA).
Inlawlawag ti hepe ti PAGASA Climate Monitoring and Prediction Section a ni Ana Liza Solis nga adda iti La Niña alert ti pagilian manipud Hulio idi napalabas a tawen ngem saan pay a nadanon ti katupag nga activity threshold tapno mangideklara iti La Niña season.
Kinunana, iti forecast-da, adda 72% chance ti La Niña ken saan nga ilaksid ti state weather bureau ti posibilidad a madanon ti threshold ti La Niña kadagiti sumarsaruno a bulan; ngem mabalin a saan a masurot a kas ti makunkuna a full -blown La Niña a mabalin nga alaenna ti 6 a bulan wenno nasursurok pay.
Maipalagip pay nga adu dagiti weather systems a mapaspasaran ditoy pagilian ita a kas iti shear line gapu ta ti La Niña ket kakuykuyog ti napigsa nga easterlies.
Isu nga ipalpalagip ti bureau iti publiko a saan nga agpakampante gapu ta adu pay a weather systems ti posible a mangiyeg iti tudo ken mangpataud iti layus ken panagreggaay ti daga kadagiti sumaganad a sumagmamano nga aldaw.
