BR LA UNION – Nagballaag ti state weather bureau iti posibilidad a panaglayos ken landslide iti sumagmamano a paset ti pagilian ita nga aldaw ti Domingo, Oktubre 26, 2025, gapwanan ti Low Pressure Area (LPA) ken Intertropical Convergence Zone (ITCZ) a mangap-apektar iti dakkel a paset ti Visayas ken Mindanao.
Iti report ti weather bureau, nasaripatpatan ti LPA agarop alas-3:00 ti parbangon iti kaadayu a 210 kilometro daya ti General Santos City.
Ngem itay alas 8:00 ti bigat, imbaga ti PAGASA a nalidem a madevelop a bagyo iti sumaganad a 24 nga oras.
Nakapauneg ti nasao nga LPA iti ITCZ ken mangapektar idiay Palawan, Visayas, ken Mindanao, bayat a Shear Line iti mangpaulep ken mangpatudo iti Extreme Northern Luzon.
Gaputi dayta, namnamaen a naulep iti tangatang, mabuyoan ti mawaras-waras a panagtudo, panaggarru-od ken panagkimat idiay rehiyon ti Caraga, Davao, Northern Mindanao, Eastern Visayas, agraman idiay probinsiya ti Albay, Masbate, ken Sorsogon.
Ballaag ti PAGASA, posible iti flash flood wenno landslide a gapwanan ti kalalainganna agingga a napigsa a buyat ti tudo.
Iti nabatbati a paset ti Mindanao, Visayas, ken Palawan, mabalin a makapadas dagiti nasao a lugar ti panagtudo gapu iti epekto ti ITCZ.
Kabayatanna, idiay Batanes ken Babuyan Islands ket makapadas ti panagtudtudo a gapwanan ti Shear Line, bayat nga idiay Aurora ken Quezon ket apektado ti Easterlies.
Idiay Metro Manila ken dadduma a paset ti Luzon, makapadas ti apagapaman a nakuyem agingga a naulep iti tangatang, apagbiit a panagtudo, panaggarruod wenno panagkimat, a mabalin a mangigubway ti panaglayos wenno panagregga-ay ti daga nu adda iti napigsa a thunderstorm.
