BR LA UNION – Napagnumwan iti Pilipinas ken China nga itultuloy ti implementasyon ti rotation and resupply missions iti BRP Sierra Madre idiay Ayungin Shoal idiay West Philippine Sea.
Naaramid ti desisyon iti maika-10 a Bilateral Consultation Mechanism (BCM) meeting ti Pilipinas ken China mainaig iti West Philippine Sea, a naisayangkat idiay Xiamen, China.
Naipamaysa ti panagtataripnong iti panangtaming dagiti agdama nga isyu iti rehiyon, ket agpada a nag-komit iti dua a pagilian nga agsarita ken agtinnulong iti laksid dagiti saan pay a narisut nga isyu.
Nagtunos ti dua a pagilian nga agtultuloy ti rotation and resupply operations (RORE) idiay Ayungin Shoal tapno mapalag-an ti tensiyon, ken binigbigda dagiti positibo a resulta dagiti nasao a misyon.
Imbinsa-binsa met ti Pilipinas ti pakaseknanna iti kaadda dagiti barko ti Chinese Coast Guard (CCG) asideg idiay Zambales ken dagiti aktibidadda kadagiti maritime zone ti Pilipinas, a segun ti Department of Foreign Affairs (DFA) a saan a maiyannurot iti 1982 United Nations Convention on the Law of the Sea (UNCLOS) ken dagiti linteg iti baybay ti Pilipinas.
Gapu iti daytoy, nagtulag dagiti dua a pagilian a papigsaen iti panagtinnulong dagiti coast guards-da ken impaganetgetda ti kinapateg ti panagtitinnulong iti ocean meteorology ken marine scientific cooperation.
Pinasingkedan manen ti Pilipinas ti dedikasyonna iti natalna a pannakarisut dagiti susik babaen ti dayalogo ken diplomasiya, kas impaganetget ni Presidente Ferdinand Marcos Jr.
Kabayatanna, naituding a maangay ti sumaruno a Bilateral Consultation Mechanism meeting ditoy Pilipinas, ngem awan pay ti opisyal a petsa.
