BR LA UNION – Nangipaay ti Pilipinas kadagiti abasto para kadagiti naapektaran ti gubat idiay Gaza babaen ti Humanitarian Air Bridge Campaign.
Ranta ti nasao nga addang a mangipaay ti tulong kadagiti naapektaran a Palestinians gaputi panagrinnupak ti Israel ken Hamas.
Segun iti Office of Civil Defense (OCD), karaman iti donasyon ti 8,323 a bonete; 3,187 a pares ti guantes, ken 20 a kubrekama.
Napasamak ti turnover iti NDRRMC Operations Center idiay Camp General Emilio Aguinaldo, nga indauluan ni OCD Administrator ken National Disaster Risk Reduction and Management Council Executive Director, Undersecretary Ariel Nepomuceno.
Dimmar-ay iti nasao a seremonya dagiti opisyal manipud iti Jordanian Honorary Consulate ken Department of Foreign Affairs (DFA).
Iti panagbetlana, impaganetget ni Nepomuceno ti kinapateg ti kontribusyon ti Pilipinas iti Humanitarian Air Bridge Campaign nga idauluan ti Hashemite Kingdom of Jordan.
Maibasar iti report, rinibu a Palestinian ti nangrugin nga agsubli idiay Gaza. Nupay kasta, nakaru ti pannakadadael ti kaaduan kadagiti istruktura kasta met ti kinakurang ti suplay ti koriente iti lugar ken dadduma pay a kangrunaan a suplay.
Segun iti Ministry of Health ti Gaza, dandani 47,000 a Palestinian ti natay sipud nangrugi ti gubat idi Oktubre 2023.
