Pito a kameng ti Central Luzon Regional Committee ti Communist Terrorist Group (CTG) ti natay kalpasan ti panagsasabetda kadagiti soldado manipud iti 84th Infantry Victorious Battalion ti Philippine Army sadiay Brgy. Malbang, Pantabangan, Nueva Ecija idi kalman, Hunyo 26, 2024.
Segun kenni Lieutenant Colonel Jerald Reyes, Commanding Officer ti 84th Infantry Battalion, nangisayangkatda iti hot pursuit operation sadiay Barangay Abuyo, Alfonso Castaneda, Nueva Vizcaya babaen ti aerial operation a sinaruno ti combat operations.
Kinuna ni Lieutenant Colonel Reyes a kas resulta iti operasyon, narekobre dagiti soldado dagiti sumaganad: tallo nga M14 rifles, innem nga M16 rifles, maysa nga M16 attached M203 rifle, maysa nga low-powered firearm, subversive documents, ken personal equipment idiay encounter site.
Segun iti militar, awan ti naipadamag a natay iti biang dagiti soldado.
Kinuna ni Lieutenant Colonel Reyes a linapdan ti militar ti plano ti Communist Terrorist Group a mangisubli iti impluensiada iti komunidad babaen ti terorismo.
Kabayatanna, dinayaw ni Brigadier General Joseph Norwin D. Pasamonte, Commander ti 703rd Infantry Agila Brigade, Philippine Army, dagiti soldado iti naballigi nga operasion ken nagyaman iti pannakitinnulong dagiti komunidad.
Inawagan ni Brigadier General Pasamonte dagiti kameng ti Communist Terrorist Group nga agsurrender dan iti gobierno ken baliwan da ti biag dan tatta nasapa pay.
