LA UNION – Dagus a kinondenar ni House Deputy Minority Leader ken ACT Teachers Party-list Representative France Castro ti plano dagiti Duterte a mangpalawa pay iti bileg ken takderda iti politika.
Daytoy ti reaksion ni Castro iti panangibaga ni Bise Presidente Sara Duterte nga agkandidato ti amana a ni dati a Presidente Rodrigo Duterte iti May 2025 midterm election , ken agkandidato met dagiti kakabsatna a ni Congressman Paolo Duterte ken Davao City Mayor Baste Duterte iti kinapresidente inton 2028.
Nadismaya ni Castro ti panagkandidato iti posision iti gobierno dagiti Duterte kinuna a pagbalinen da a negosio saan laeng a tapno agsamsam no di ket tapno makaluban pay dagiti basolda kadagiti umili.
Segun ken ni Castro iti nadakamat a statement ni VP Duterte ket makita a ti laban ti dua a paksyon ti agturay a klase ket all out iti nagbaetan dagiti Dutertes a supsuportaran ti China ken dagiti Marcoses a supsuportaran ti US.
Inawagan ni Castro dagiti umili a Pilipino nga agbalinda a nasiput ken saanda nga ipalubos ti aniaman a pannakapalawa dagiti political dynasties ken monopolization of power.
