LA UNION – Nagpanawagan ni Philippine National Police (PNP) chief Police General Rommel Marbil kadagiti sigud a nagtakem a hepe ti PNP, nga agparang ken law-lawagan ti pakainaigan da iti kontrobersiyal a drug war ni sigud a President Rodrigo Duterte.
Inaramid ni Gen. Marbil iti panawagan kasaruno ti panangibutaktak ni sigud a Phil. Charity Sweepstake Office General Manager ken retired police colonel Royina Garma, nga adda iti naipatungpal a payment ken rewards system iti panang-patay dagiti drug suspect.
Segun kenni Marbil, ibilang da a seryoso ti nasao nga alegasyon, isunga isag-sagana da iti maysa a nauneg nga imbestigasyon, tapno kitaen nu pudno nga adda dagiti retired PNP chief and officials a nagnumar iti nasao a sistema iti kampanya kontra iligal a droga.
Nakailanad iti affidavit ni Garma nga imbasa na kabayatan ti quadcom hearing idi Biyernes, a ni Senator Christopher “Bong” Go ken mistah na a ni sigud a National Police Commission commissioner Edilberto Leonardo ket karaman iti kalakaran ti drug campaign.
Daytoy kunana ket tapno naan-anay a maiyemplementar iti replica ti war on drugs ni Duterte idiay Davao, iti intero a pagilian idi panawen ti termino ti sigud a Presidente.
Segun kenni Garma, iti reward system ket manipud P20,000 agingga P1 million, depende iti mapatay a drug suspect.
Ni Senador Go ket sigud a nagserbi a personal aide ken Special Assistant to the President ni Duterte bayat a ni Leonardo ket nagserbi a commander iti Manila Police District Moriones Police Station idi 2017 iti kangitingitan ti war on drugs campaign ti Duterte administration .
Idi Sabado, inawagan ni Go iti statement ni Garma a diversionary tactic tapno iyaw-awan ti pudno nga isyu, maipapan iti sangsangwenna a kaso a pammapatay kenni sigud a PCSO board secretary Wesley Barayuga.
