BR LA UNION – Nagpanawagan ni Philippine National Police (PNP) chief Gen. Jose Melencio Nartatez Jr. kenni Senador Ronald “Bato” dela Rosa nga irespeto iti uniporme ken tsapa a naminsanen nga insuot na kas hepe ti pambansang pulisya iti tengnga ti agtultuloy nga operasyon tapno sapolen isuna.
Segun kenni Nartatez, agtaltalinaed iti respeto ti PNP kenni Dela Rosa kas sigud a lider ti organisasyon, ngem mangnamnama da a makitinnulong daytoy iti legal a proseso iti panangipatungpal ti arrest warrant nga inyisiyu ti International Criminal Court kontra iti senador.
Kinuna pay ti PNP chief a nainget a sur-suruten dagiti pulis iti protocols ken human rights standards iti operasyon ken nabilin dagiti ground unit a liklikan ti agusar ti puwersa ingkaso a makita ni Dela Rosa.
Ni Dela Rosa ti matudtudo a kangrunaan nga arkitekto ti war on drugs ni sigud a Presidente Rodrigo Duterte ken kangrunaan a nangipatungpal ti Oplan Tokhang idi isuna pay ti PNP chief.
Sap-sapolen ita isuna ti ICC gaputi kaso a crimes against humanity gapu iti saan a bumaba a 32 a maipagarop a pammapatay manipud Hulyo 2016 agingga Abril 2018.
Idi Mayo 21, imbilin ti Department of Justice iti law enforcement agency nga arestaren ni Dela Rosa kalpasan a saan a nangiruar ti temporary restraining order ti Supreme Court kontra iti pannakitinnulong ti gobyerno iti ICC.
