BR LA UNION – Inallokoy ti baro a Philippine National Police (PNP) Chief PGen. Nicolas Torre III ni sigud a Presidential Spokesperson Atty. Harry Roque a kas maysa kunana nga abogado ket maiparbeng laeng a sangwenna dagiti kaso ken agsublin ditoy Pilipinas.
Kinuna ni Torre, dagiti kaso ni Roque ket saan a pang-kalsada laeng a mabalin ti mangisayangkat ti panagu-ummong wenno rally, ngem ketdi kasapolan nga isubmitir na ti bagi na iti korte tapno sadiay na nga ilanad dagiti argumento na seknan iti kaso.
Pattien pay ni Torre a nasaysayaat no isuko ni Roque ti bagina ken dagiti 49 a dadduma pay a karaman iti kaso mainaig iti panagsaknap ti illegal a Philippine Offshore Gaming Operations (POGO) ditoy pagilian.
Kabayatanna, segun iti baro a lider ti PNP, maysa ti pannaki-koordinar ti gobierno ti Pilipinas iti International Criminal Police Organization (Interpol) kadagiti mekanismo a mabalinda nga usaren para iti posible a pannakaisubli ni Roque ditoy pagilian.
Maysa daytoy a whole government approach ken impaganetget iti hepe iti ar-aramiden ti Department of Foreign Affairs (DFA) a panang-kanselar iti pasaporte ni Roque ken dadduma pay nga akusado tapno saan dagitoy ti waya wenno gundaway a makapagrikos iti ruar ti pagilian.
Iti agdama ket 2 manipud iti 51 nga akusado iti nakemmeg ken adda itan iti kustodiya ti Criminal Investigation and Detection Group bayat nga 49 a dadduma pay iti sap-sapolen dagiti otoridad a karaman iti iligal nga operasyon ti Lucky South 99 a pakairam-ramanan ni Roque gaputi kaso a qualified human trafficking a saan a bailable iti sidong ti linteg ti Pilipinas.
