BR LA UNION – Nakatuding a mangiruar ti subpoena iti Philippine National Police – Criminal Investigation and Detection Group (PNP-CIDG) kontra kenni Senator Ronald ”Bato” dela Rosa kas paset ti panang-lukat manen iti imbestigasyon iti nasurok 100 a reklamo nga adda pakainaiganna iti maipagarop nga extrajudicial killings idiay Davao Region.
Segun kenni Department of the Interior and Local Government (DILG) Secretary Jonvic Remulla, mapaayaban iti senador tapno personal a sumango iti Criminal Investigation and Detection Group kas paset ti imbestigasyon kadagiti insidente idi isuna pay iti Davao City Police Office director ken regional police chief iti rehiyon.
Inlawlawag pay ti opisyal a saan nga arrest warrant manipud International Criminal Court ti maipatulod ken awan met ti plano nga arestaren ni dela Rosa.
Kinuna ti Criminal Investigation and Detection Group a kayat da a direkta a maala ti palawag wenno sungbat ni dela Rosa, a sigud a nagbalin nga hepe ti Philippine National Police iti kangitingitan ti war on drugs campaign ti sigud nga administrasyon.
Iti sabali a bangir, naipasidong iti alert status dagiti airport, pantalan, ken dadduma pay nga exit points ditoy pagilian tapno bantayan iti garaw ken posible nga ipapanaw wenno panagluas ti senador bayat a maisay-sayangkat ti imbestigasyon.
