BR LA UNION – Impanakkel ti Philippine National Police Highway Patrol Group dagiti naibabawi da a takaw a lugan idi bulan ti Enero ita a tawen.
Maibasar iti datos, umabot iti 76 a lugan ti narekobre da manipud kadagiti agtatakaw.
Resulta daytoy ti awan sarday nga operasyon ti PNP-HPG kontra kadagiti carnapper.
Segun kenni PNP-HPG Director, Police Brigadier General Eleazar Matta, itultuloy da dagiti nasao nga operasyon tapno agsardengen iti nasao nga ilegal nga aktibidad.
Manipud iti nasao a bilang dagiti lugan, kaadwan a natakaw ket 4-wheeled vehicles nga umabot iti 59, sumarsaruno ti motorsiklo nga umabot iti 17.
Umabot met ti 45 a suspek iti naaresto dagiti kameng ti PNP-HPG .
Nakaidatag metten ti HPG ti 14 a kaso a kriminal kontra kadagiti mairamraman iti panagtakaw ti lugan.
