BR LA UNION – Personal a nagturong ditoy broadcast center ti Bombo Radyo La Union iti maysa a tricycle driver gaputi maipagarop a pannaka-carnap ti motorsiklo na a Honda TMX 155 idi Sabado, Agosto 23, 2025.
Ipan-panawagan ni Dante Felicitas y Fernando, 63-anyos, residente ti Barangay Catbangen, San Fernando City, La Union kadagiti umili nga i-report iti kaasetgan a pulisiya nu adda agilaklako ti motorsiklo, amangan nu daytoy ti natakaw a motorsiklo na.
Segun kenni Felicitas, nakaparada ti motorsiklo na iti uneg ti Borja’s compound idiay No. 227 Flores St. ti Barangay Catbangen.
Istorya na a nabati na ti tulbek iti nasao a motorsiklo ken us-usarenna daytoy tunggal alaenna ti ipas-pasada na a traysikel iti kaaruba da.
Kinuna na a saan a mabigbig iti suspek agsipudta nakasuot ti bonete, maibasar iti naala a CCTV footage.
Ti nasao nga insidente ket immunan nga in-report ni Felicitas kadagiti otoridad ditoy siyudad ti San Fernando.
