BR LA UNION – Iggem itan ti Philippine National Police (PNP) ti kanayunan nga innem a lisensiyado a paltog ni Senator Ronald “Bato” Dela Rosa.
Segun iti PNP, insuko dagiti abogado ti Senador dagiti nasao a paltog kalpasan a naibabawi ti License to Own and Possess Firearms (LTOPF) na ken rehistro dagiti nasao nga armas.
Indaulwan ti PNP Firearms and Explosives Office ken Regional Civil Security Unit 4A (Calabarzon) iti pannakitinnulong dagiti pulis iti organisado a proseso para iti temporary safekeeping dagiti armas, manipud iti pagtaengan ti senador idiay Silang, Cavite.
Gaputi dayta, pakabuklan a 26 a paltog ti senador ti adda itan iti kustodiya ti PNP.
Idi Hunyo 11, immuna nga insuko dagiti abogado ti senador iti 20 nga armas.
Adda pay ti 91 nga armas ti senador manipud iti pakabuklan a 117 a paltog a nakarehistro iti nagan ti senador.
Maipalagip a nangiruar ti pammilin iti PNP Firearms and Explosives Office a nang-revoke iti lisensya dagiti paltog ti senador kalpasan a nairuar ti warrant of arrest na gaputi war on drugs idi panawen ni sigud a Presidente Rodrigo Duterte.
