BR LA UNION – Siniguro ti Philippine National Police (PNP) iti naan-anay a suporta ken pannaki-tinnulong iti isay-sayangkat a nairut nga inspeksiyon ti Department of Public Works and Highways (DPWH) kadagiti proyekto nga adda pakainaiganna iti panangkontrol iti panaglayos ti naduma-duma a paset ti pagilian.
Daytoy ket maysa a direkta a sungbat iti panawagan nga indanon ni Presidente Ferdinand R. Marcos Jr., para iti maysa a napudno, naurnos ken awan maris a korapsyon iti panangipatungpal amin a proyekto pang-imprastraktura ti gobyerno.
Segun kenni Acting Chief PNP, Police Lieutenant General Jose Melencio Nartatez Jr., amin a yunit ti pulisya iti intero a pagilian ket nakasagana ken nakaalerto a mangipaay ti seguridad ken proteksyon bayat a dagiti kameng ti DPWH ket aktibo a mangisay-sayangkat ti inspeksyon iti naduma-duma a flood-mitigation site wenno lugar a pakaar-aramidan dagiti proyekto tapno makissayan iti epekto ti panaglayos.
Innayon pay ni Nartatez a napateg iti papel ti PNP iti panangsiguro ti kinatalged, saan laeng a ti publiko, ngem agraman dagiti proyekto nga adda dakkel a maitulong na iti komunidad iti panangsango ken panangsungbat kadagiti problema ken karit a gapwanan ti nalawa a panaglayos.
Mainaig ti daytoy, nangipaay iti direktiba ni Nartatez iti amin a regional ken lokal nga opisina ti pulisya a dagus a maki-koordinar iti DPWH ken iti lokal a gobiyerno tapno masiguro ti maysa a naurnos, nakapya, ken natalged a panagbisita ken inspeksyon iti amin a flood-control site a sakop ti responsibilidad.
Ti nasao a koordinasyon ket kasapolan tapno maliklikan ti anyaman nga aberya wenno insidente a mabalin a makatubeng iti inspeksyon.
