Pinapigsa ti Philippine National Police (PNP) iti kampania tapno labananan iti kumarkaro a problema ti ilegal nga operation ti Philippine Offshore Gaming Operators (POGOs) ken Internet Gaming Licensees (IGLs) iti bansa.
Daytoy nga addang ket kas sungbat iti agtultuloy a panagraira dagiti ilegal nga operasion a nakabalkot kadagiti nadumaduma a porma ti negosio.
Dinayaw ni acting PNP chief, Police Lieutenant General Jose Melencio Nartatez Jr. iti Criminal Investigation and Detection Group (CIDG) Southern Metro Manila District Field Unit ken ti Southern Police District (SPD) gapu iti napartak ken epektibo a sungbatda kadagiti reports ti nasao nga ilegal nga aktibidad.
Impaganetget ni Nartatez iti kinapateg ti inaramidda iti panangtaginayon ti urnos ken pananglaban iti kriminalidad.
Idi nabiit, nangiserbi ti Warrant of Arrest dagiti otoridad a nagresulta ti pannakadiskubre ti maysa nga illegal POGO/IGL hub.
Daytoy nga hub ket nasarakan iti likudan ti maysa nga IT-BPO firm iti maysa nga establisimiento a masarakan idiay Upper McKinley Hills, Taguig City.
Naaramid iti operasion babaen ti panagtitinnulong ken koordinasion iti Presidential Anti-Organized Crime Commission (PAOCC).
Impaganetget ni Nartatez nga iti kapada nga operasion ket mangipakpakita ti agtultuloy a panangpadas dagiti sindikato nga agoperate ti illegal gaming activities iti pagilian, uray addan ti maipatpatungpal a national ban.#
