Inwaragawag iti Hepe ti San Juan Municipal Police Station a ni Police Major Reynante Organista a nakasaganan ti ili ti San Juan para ti umadani nga UNDAS 2025.
Iti pannakiuman ti Bombo Radyo La Union iti Hepe ket imbatad na a nakalatagen ti security plan para kadaitoy nga okasyon ken karaman dita iti rerouting kadagiti agturong ti amianan ken abagatan.
Mausar iti diversion ken bypass road manipud Barangay Taboc, San Juan agingga Barangay Camansi, Ciudad ti San Fernando tapno saanen a maipit pay dagiti motorista iti panagdudupudop dagiti lugan, nangruna idiay national highway a pakasarakan ti agkakaabay a government ken private cemeteries.
Kabayatanna, maipalubos met ti ag-park iti shoulder ti diversion road ti sangwanan ti sementeryo ngem nu saan a malapdan ket kinuna ni Major Organista a mapilitan da nga ipausar ti shoulder iti national highway tapno maakomodar iti bilang dagiti umay bumisita.
Nagpakdaar met iti Hepe a kumpiskaren da dagiti bladed weapons, arak, ken napipigsa a sound systems a nainget a maiparit para iti panagraem ti okasyon.
Mainaig kadaitoy ket maballaagan met dagiti tattao a nu kabaelan da iti bumisita a nasapsapa ngem ti Nobyembre Uno ken Dos ket aramiden dan, nangruna kadagiti adda iti kakadwa da nga ubbing ken senior citizens.
Numero uno iti San Juan, La Union nga addaan ti kadakkelan a mapaspastrek maipapan ti turismo isu a manamnama nga agingga agleppas ti UNDAS ket nadagsen iti taray ti trapiko, nangruna idiay Barangay Urbiztondo a pagaammo kas business district ti ili ken pakasarakan kadagiti nalalatak a local restaurants ken bars.
