Suportado ti Philippine National Police (PNP) ti nagbalin a direktiba ni PNP Chief Police General Nicolas Torre III a papigsaen ti serbisyo ti Internal Affairs Service (IAS) tapno masiguro ti integridad ti organisasyon da.
Segun kenni PNP-IAS Inspector General Attorney Brigido Dulay, mangipakpakita laeng daitoy a ti panggep latta ken prayoridad ti kapulisan ket ti kaadda ti integridad, pagsungbatan, ken disiplina kadagiti serbisyo da.
Kinunana a gapo iti suporta ken talek ti hepe ti hanay da ket tungpalen da pay lalo ti mandato na nga addaan ti sibubukel a tignay ken tured.
Kabayatanna, sakbayna ket imbatad met ni Torre a tarigagay na a papigsaen ti IAS tapno mapapartak pay ti aksyon ken imbestigasyon da kadagiti isyu mainaig kaditi bangad a pulis nga aglablabsing iti mandato a sinapataan da.
Maysa met daitoy kadagiti addang ti hepe tapno marugiananen ti internal cleansing iti uneg ti hanay ken organisasyon para ti mas epektibo pay a serbisyo publiko kadagiti Pilipino.
