LA UNION – Naibutaktak a maysa a sigud a Chinese police officer iti maipagarop a top boss iti naraut a POGO hub idiay Porac, Pampanga a ni Duanren Wu.
Kinumpirma daytoy ni Cassandra Li Ong, iti Whirlwind Corporation stakeholder ken representative ti POGO hub a Lucky South 99, bayat iti panagsalodsod kenkuana ni Committee on Dangerous Drugs chair Surigao del Norte 2nd District Representative Robert Ace Barbers iti naisayangkat a maikapat a joint public hearing ti House Quad Committee idi Miyerkules.
Imbaga pay ni Barbers kenni Cassy Ong a maibasar ti nakalap da nga impormasyon, iti sigud a boss na ket naka-aramid ti adu a bad records idiay China, ngem sungbat met ni Ong a saanna nga ammo nga adda record iti sigud a boss na.
Maipalagip nga immunan nga imbaga ni Ong a ninong na ni Duanren Wu a bestfriend met ti ina na a Chinese.
Kabayatanna, ginisa ni Cong. Barbers ni Cassy Ong nu sadino iti naggapwan iti kuwarta nga in-invest dagiti partner-na iti panagipatakder dagiti pasdek ti POGO idiay Porac ket direkta na a sinalodsod nu naggapo kadi dagitoy iti drugs wenno money laundering.
Sungbat ni Ong a makasiguro a saan a naggapo iti drugs wenno money laundering.
Kabayatanna, ini-excuse ti House Quad Committe ni Ong iti panagdengngeg gaputa kasapolan a maiturong iti ospital kalpasan a naulaw gapu iti panagbaba ti blood pressure na iti 80/40 idi maamiris daytoy.
Segun iti medical staff ti House, mabalin a sinyales daytoy ti hypotension.
