LA UNION – Impanamnama ni S/Supt. Ricardo Layug Jr., acting Provincial Director ti La Union Police Provincial Office (LUPPO), a maiparikna ti police presence iti probinsya.
Iti pannakiuman ti Bombo Radyo kenni S/Supt. Layug, kinunana a maysa kadagiti kangrunaan nga ipatungpalna ket iti pammilin ni Philippine National Police Chief Director General Oscar Albayalde ma maaddaan iti internal cleansing iti organisasyon.
Karaman pay ditoy iti panangipatungpal iti amin a programa nga agtaud ti national headquarter ken maammuan dagitoy iti amin a pulis.
Sigun pay ti opisyal, iti panagtakemna kas mangidadaulo iti LUPPO ket maimatangan dagiti pulis nga agtrabtrabaho ken mas sumayaat ti kooperasyon kadagiti umili.
Kabayatanna, impeksa ni S/Supt. Layug, saan a maikawa isuna a maidistino iti Ilocos Region kangrunaan iti La Union gapu ta ditoy a nangrugi ti karerana kas pulis iti rangko a tiniente idi tawen 1993.
Nakaragsakanna met a nagsubli isuna nga agsirbi iti La Union kalpasan iti 25 a tawen gapu ta adu ti nakalaglagip a kapadasan iti serbisyo.
Sinukatan ni S/Supt. Layug iti nasao a posisyon ni S/Supt. Rodolfo Rafanan nga uppat nga aldaw laeng a nagtugaw idiay LUPPO.
