BR LA UNION – Nagpakita iti publiko ni Pope Francis iti umuna a gundaway kalpasan ti nasurok lima a lawas sipud naospital idiay Gemelli idiay Rome.
Inaramid ti Sto Papa iti public appearance ita nga aldaw, Marso 23, ken nag-wave daytoy manipud iti maysa a balkonahe iti ospital sakbay a nagsubli iti uneg ti silid.
Maipalagip a na-admit iti ospital ti 88-anyos a Santo Papa idi Pebrero 14 gaputi nakaru nga impeksyon iti bara a nagbalin a rason ti panagkapsot ti salun-at na iti uneg ti 12 a tawen a panagserbi na kas Santo Papa.
Imbaga dagiti doktor ti Santo Papa idi Sabado a kasapolanna pay ti adu a panawen tapno naan-anay a pumigsa ti bagi na, isunga immandar dagitoy nga aginana pay ti dua a bulan idiay Vatican.
Nagpakita ni Pople Francis iti balkonahe ti ospital a naka-wheelchair, immisem ken nag-wave iti maysa a grupo dagiti tagasuporta na a nagu-ummong iti ruar ti ospital.
Madlawan iti rupa ti Santo Papa nga arigna bimsug ken nagpaut laeng ti sumagmamano a kanito iti balkonahe.
Nangipaay daytoy ti ababa a panagyama babaen iti nakapsot a boses na iti maysa a miyembro ti crowd a nagimet iti yellow a sabong .
