LA UNION – Nangiyuswaten iti La Union Police Provincial Office iti ‘intensive search’ para kenni Poro Point Management Corporation (PPMC) Director Nicky A. Oller, 59-anyos, kasaruno a misteryoso a nagpukaw kabayatan iti routine morning walk na idiay Tubao, La Union, idi aldaw ti Biernes, Hulyo 31.
Kas Director ti PPMC a subsidiary iti Bases Conversion and Development Authority (BCDA), napateg iti akem ni Nicky iti nasao a kompanya. Isuna ket residente ti Barangay Población ken imbati iti pagtaengan da ti alas-5:30 ti bigat para iti kadawyan a panagpagna, ngem saanen a nakasubli pay.
Impadamag iti asawa na a ni Melanie, 50-anyos, a mapukpukaw ni Nicky kasaruno nga awan iti mangngegan manipud kenkuana ti sumagmamano nga oras.
Segun iti Tubao Municipal Police Station, nakaawat dagiti otoridad iti report babaen iti 911 Emergency Hotline iti oras alas-8:37 ti bigat ti Biernes, isu a nangpartuat daitoy iti dagos a ‘search operation’ ti intero a munisipalidad. Nangrugi metten nga ag-review dagiti imbestigador kadagiti closed-circuit television (CCTV) footages kadagiti posible a ruta ken nagnaan ni Nicky sakbay a nagpukaw isuna.
Segun iti agdama nga impormasyon, maudi a nasaripatpatan ni Nicky a nakasuot ti green-and-black hooded jacket, jogging pants, ken puraw a sapatos. Agdangkaw daitoy iti 5’8″ ken katamtaman laeng iti pammagbagi na.
Pagaammo ni Nicky para iti dekada nan a serbisyo publiko, nagserbi isuna kas Municipal Councilor iti Tubao manipud 2001 agingga 2010 kasta met iti tawen 2013 agingga 2019.
Maallukoy iti publiko a tumulong iti panagbirok ken makiuman laeng iti Tubao Municipal Police Station wenno 911 Emergency Hotline para ti aniaman nga impormasyon.
