Narekobre ti Philippine National Police (PNP) dagiti kabarwan a tulang a posible a rurog ti tao idiay Taal Lake manipud iti napalabas a dua nga aldaw a search and retrieval operations idiay Batangas.
Segun kenni PNP Spokesperson PBGen. Jean Fajardo, dagiti rurog ket maipasidong iti nainget a panagamaris tapno maamwan no daytoy ket pudno a nagtaud iti tao.
Inlawlawag ti tagapagsarita, no mapaneknekan a dagiti rurog ken manipud iti tao ket dagos a maipasidong iti cross matching kadagiti DNA samples manipud kadagiti kabagyan dagiti mapukpukaw a sabungero.
Kabayatanna, malaksid kadagiti tulang ket narekobre met dagiti personal nga alikamen dagiti biktima kas iti kawes, tsinelas, sapatos, kallugong, ken hoodie.
Nagpanawagan met ni Fajardo kadagiti kabagyan dagiti dadduma a biktima a makabigbig kadagiti gamit ken kawes a narekobre dagiti otoridad kadua dagiti naala a rurog nga ipakaammo a dagos iti opisina no daytoy ket kukua dagiti mapupukaw a kapamilyada.
Mabalin nga agturong iti PNP para iti panakapaisidong ti panangala ti DNA samples para iti cross matching.#
