Im-imbestigaranen ti National Privacy Commission (NPC) ti posible a privacy breach iti public display dagiti Posted Computerized Voter’s List (PCVL) kadagiti sumagmamano a polling precincts iti kallabes a midterm elections idi Mayo 12.
Segun iti komisyon, naipadamag a naipaskil kadagiti lugar nga accessible iti publiko kas kadagiti bulletin boards ti ruar dagiti voting precincts iti computerized voter’s list a naglaon kadagiti personal information dagiti botante, pakairamanan ti kumpleto a nagan, perma, ken residential address.
Mainaig iti daitoy, ad-adalen pay ti komisyon nu ti nasao a panangipablaak iti publiko dagiti PCVLs ket manglabsing iti Data Privacy Act of 2012.
Pinaregta met ti privacy body iti publiko a liklikan ti panangala ti pictures kadagiti PCVL ken saan nga i-post iti social media wenno sabali pay a platforms nga awan iti consent manipud iti nakalista nga indibidwal.
Mabalin a maibandera ti privacy risks ti saan nga otorisado a panagibinglay dagiti personal data karaman pay ti posible a pagsungbatan iti linteg.
Nagballaag ti komisyon nga i-report ti aniaman a kapada nga insidente babaen ti website a sprint@privacy.gov.ph.
