Immapela ti Parish Pastoral Council for Responsible Voting (PPCRV) a nu mabalbalin ket daitoyen ti maudi a gundaway a matantan ti Barangay and Sangguniang Kabataan Elections (BSKE) kalpasan a maiyakar manen manipud Disyembre 2025 nga agturong iti Nobiembre 2026.
Segun kenni PPCRV chairperson Evelyn Singson, napateg ti regular a pannakaisayangkat ti eleksyon tapno mapagtalinaed ti accountability dagiti opisyales ken talek manipud iti publiko ken innayon a ti maulit-ulit a pannakatantan na ket makadadael iti demokrasya.
Maipalagip a pinermaan idi kallabes ni Presidente Ferdinand Marcos Junior ti Republic Act No. 12232 a nangituding ti baro a petsa ti BSKE kasaruno ti nakailanad iti baro a linteg a tunggal uppat a tawenen iti pannakaisayangkat na.
Inawat metten ti grupo ti rason tapno maikkan iti dalan ti panagsagana ti kaunaan a Parliamentary Elections iti Bangsamoro Autonomous Region in Muslim Mindanao (BARMM) inton Oktubre 2025, ngem impaganetget ni Singson a saan a rumbeng a pagbalinen a rason daitoy tapno maulit-ulit nga itantan ti eleksyon kadagiti barangay.
