LA UNION – Umaboten iti 58 pamilya wenno 119 a tattao iti nagturong kadagiti evacuation centers idiay Bangar, La Union gaputi panagduprak ti bagyo Rosita.
Segun kenni La Union Vice-governor Aureo Nisce, naggapo dagiti nasao nga evacuee idiay Barangay Mindoro, Bangar gaputi amak nga aglupyas iti Amburayan river.
Ita nga agsapa, rugyan manen dagiti kameng ti Provincial Disaster Risk Reduction and Management Office (PDRRMO) a tumulong iti panangiyakar dagiti residente nga agnanaed kadagiti flood prone areas kas idiay ili ti Aringay ken Luna a masansan a malayos nu adda sumangbay a dakes a panawen.
Kinuna pay ni Nisce, nga agtataripnong iti oras ti alas-8:00 ita nga agsapa iti Provincial Council tapno talantanen iti panangipatungpal ti liquor ban.
Innayon pay ti bise-gobernador, nga ipatungpal pay ti PDRRMO iti forced evacuation nu kasapolan tapno magun-od iti target a ‘zero casualty’ iti intero a probinsiya.
