LA UNION – Maiyannurot iti Proclamation 728 indeklara ni President Ferdinand R. Marcos Jr., iti Nobyembre 4 kas Day of National Mourning, kas pannaki-simpatiya kadagiti pamilya a napukawan ti ipat-pateg ti biag, gaputi panagdrupak ti Severe Tropical Storm Kristine idi napan a lawas.
Babaen ti nasao a proklamasyon a napetsaan ti Oktubre 30, 2024 a pinirmaan ni Executive Secretary Lucas Bersamin, maikabil iti half-mast amin a bandera ti Pilipinas a makita kadagiti pasdek ken installations ti gobyerno iti uneg ken ruar ti pagilian inton Lunes, maiyannrot iti Republic Act (RA) 8491 ken Proclamation 728.
Kagiddan daytoy iti panangallokoy ni President Marcos iti amin a Pilipino a mangisagut ti kararag para kadagiti natay iti napasamak a trahedya.
Maipalagip nga idi Oktubre 21 agingga 25, nangigubway ti nakaru a layos ken landslide iti napigsa ken tuloy-tuloy a panagtudo ken angin a tugot ti bagyo Kristine iti dackel a paset ti pagilan.
Maibasar iti naudi a report ti National Disaster Risk Reduction and Management Council idi October 30, iti Severe Tropical Storm Kristine ket naka-apektaran ti 1,788,630 a pamilya wenno buklen ti 7,033,922 nga indibiduwal ken nakatayan ti 140 a tattao.
