Nangipadanon ti pakaseknan ti Philippine Coast Guard (PCG) mainaig ti nasaripatpatan a presensya ti maysa a barko ti Chinese Coast Guard (CCG), a nabigbig iti numero a CCG 5901 asideg ti Exclusive Economic Zone (EEZ) ti Pilipinas.
Daitoy ket makuna kas ‘monster ship’ gapo iti kinadakkel ken kadagsen na a 12,000 tonelada, lima a daras a dakdakkel ngem iti kadakkelan a barko ti PCG ken nadetekta manipud iti 54 nautical miles idiay Capones Island, Zambales.
Usar ti Dark Vessel Detection System ti Canada, pinasingkedan ti PCG ti nakita a barko ti China idi Sabado ti rabii, ken sigud met a naipatulod ti BRP Cabra, maysa nga helicopter, ken PCG Caravan tapno mangobserbar iti nadakamat a barko.
Iti barko ti CCG nga immuna a naipadamag asideg ti Scarborough Shoal (Bajo de Masinloc), ket napaliiw met a naggaraw agturong ti pa-laud a direksyon ken maudi a nasaripatpatan iti 85 nautical miles manipud ti Zambales.
Impaganetget ti PCG a ti presensya dagiti barko ti China iti uneg ti EEZ ti Pilipinas ket maysa a karit iti kinasoberano.
Kinuna met dagiti maseknan a protektaran da dagiti mangngalap a Pilipino a addaan operasyon kadagitoy a paset ti kabaybayan,kasta met a siguraduen da iti natalged ken access iti nadakamat a danum nga awan ti mapadpadasan nga harassment.
