LA UNION – Pormal a nalukatan ti Palarong Pambansa 2024 idiay Cebu City idi kalman, Hulyo 9, babaen kenni Presidente Ferdinand R. Marcos Jr.
Nabara ti panang-pasangbay iti Presidente dagiti rinibu nga atleta a nagsisinnublat pay a naki-selfie kenkuana.
Nupay kasta, no show ni Vice President ken outgoing Education Sec. Sara Duterte iti nasao nga aktibidad nga indauluan ti Department of Education.
Kabayatan ti opening ceremony idiay Cebu City Sports Center (CCSC), nagturong in Duterte iti Basilica Minore del Santo Niño, sumagmamano laeng a kilometro ti kaadayu na manipud iti venue ti Palarong Pambansa.
Bimmisita pay ti Bise Presidente idiay Cebu City Medical Center nga asideg laeng ti Cebu City Sports Center .
Nagturong met ni Sen. Imee Marcos idiay Cebu City Sports Center ngem saan a nagbayag ken saan da a nagdinnanon iti kabsat na a ni President Marcos.
Kadwa ni Pres. Marcos iti entablado da Cebu Gov. Gwendolyn Garcia ken ti agdama a Cebu City Mayor Raymond Alvin Garcia.
Dinayaw ni Marcos dagiti lokal nga opisyales ken organizers gapu iti panangawat da iti karit nga isayangkat ti nasao nga aktibidad iti lugar dagitoy.
Impalagip ti Presidente kadagiti student-athletes nga agserbi daytoy a pagsanayan, panangipakita ti talento ken dedikasyon dagiti agtutubo a Pilipino.
