BR LA UNION – Inyanunsiyo ni President Ferdinand Marcos Jr. a mangrugi ti panagibunong ti P5,000 cash relief assistance kadagiti 139,000 tricycle drivers iti 17 a local government units idiay Metro Manila ita nga aldaw ti Martes, Marso 17, 2026.
Iti panagibunong ti ayuda ket idaulwan ti Department of Social Welfare and Development (DSWD) iti tulong dagiti kameng ti lokal a gobyerno.
Kalpasan idiay Metro Manila, sumaruno nga umawat ti ayuda dagiti dagiti tricycle drivers kadagiti probinsiya ditoy pagilian, pakairamanan dagiti jeepney drivers ken Transport Network Vehicle Service (TNVS).
Iti maudi a lawas ti bulan ti Marso, nakatuding met nga agibunong ti fuel subsidy iti Department of Transportation (DOTr) para iti masakopan da a sektor.
Ti nasao nga addang ti gobyerno ket tapno maalay-ayan ken makissayan ti nadagsen nga epekto iti panagbiag dagiti Pilipino iti nangato a presyo ti lana a gapwanan ti tensiyon idiay Middle East.
