Nakasublin ditoy Pilipinas ni Presidente Ferdinand Marcos Jr. kalpasan iti inaramid na a panagsarungkar idiay Estados Unidos ken personal a panakitaripnong kenni President Donald Trump.
Iti arrival statement ti Presidente kasaruno ti panagsangpet na idi rabii, Hulyo 23, impasigurado na iti tulong ti gobyerno para kadagiti naduprak ti nakaro a panaglayos gapo iti epekto dagiti bagyo ken ti habagat ken inallukoy iti publiko a sumurot iti pammilin dagiti otoridad.
Iti sabali a bangir, imbinsa-binsa ti Presidente dagiti sumagmamano a balligi ti panakataripnong na kada U.S. Secretary of Defense Pete Hegseth ken US Presidente Donald Trump partikular iti saritaan maipapan ti seguridad, ekonomiya, ken defense cooperation.
Impanakkel pay ni Marcos a nakagun-od isuna ti nasurok $21 bilyon investment pledges manipud kadagiti nakataripnong na a business leaders ken top executives manipud kadagiti nadumaduma a kompanya idiay Estados Unidos.
Kabayatanna, inimbitar ti Presidente ni Trump a sumarungkar ditoy pagilian ken makipaset iti Association of Southeast Asian Nations (ASEAN) meeting inton 2026.#
