BR LA UNION – Bimmaban ti 50% iti presyo ti kamatis kadagiti kangrunaan a pagtagilakwan, maibasar iti report ti Department of Agriculture (DA).
Segun kenni DA Asec. Arnel De Mesa, manipud iti sigud a P240 kada kilo idi napan a lawas, umabot laengen ti P120 ti kada kilo iti presyo ti kamatis ita a lawas.
Adayon nga amang daytoy manipud iti sigud a P350 agingga P360 kada kilo ti kamatis idi holiday season agingga idi sumungad ti baro a tawen 2025.
Immunan a pinatta-patta ti DA nga agingga agtapos ti bulan ti Enero 2025 wenno umuna a paset ti Pebrero 2025, mabalin nga agsublin ti normal a presyo ti kamatis.
Depensa ti ahensiya, naapektaran iti supply ti kamatis iti naudi a paset ti 2024 gapu kadagiti nagsasaruno a kalamidad ngem kagiddan iti in-inut a panagapit kadagiti probinsiya a kangrunaan a supplier ti kamatis ket agsub-sublin iti normal a supply.
Maibasar iti datus ti departamento, agingga 45% iti pakabuklan a tomato production ditoy pagilian iti naapektaran kadagiti naglabas a bagyo idi napalabas a tawen.
