BR LA UNION – Nainget nga inlibak ti Palasyo ti Malakayang a tagibassiten ti gobierno ti agdama a kasasaad seknan iti panagngato ti presyo ti lana.
Segun kenni Palace Press Officer Usec. Claire Castro, nalawag nga awan ti krisis iti suplay ti petrolyo ditoy pagilian, ngem mapaspasamak ti price disruption gapu iti rinnupak idiay Middle East.
Impaganetget ni Castro, ar-aramiden ti gobyerno iti amin tapno masiguro nga awan ti panagkurang iti suplay ti krudo, fuel, ken taraon.
Kinuna ni Castro, nakabantay dagiti ahensya ti gobyerno a kas ti DOE, DA, ken DSWD tapno mangipaay ti tulong ken siguradwen a saan a marikna dagiti umili ti panagkurang.
Innayon pay ti Palace Official nga uray ngumatngato ti presyo, kayat ti Presidente nga iparikna a kabaelan ti gobierno a salakniban dagiti umili.
Nupay kasta, inadmitir ni Castro a saan a maliklikan a maapektaran ti Pilipinas iti krisis idiay Middle East, isunga kalikagumanna ti panagtitinnulong ken panagsalimetmet no kasapulan.
Iti agdama, agtultuloy ti panagpursige ti DOE, nga idaulwan ni Energy Secretary Sharon Garin, a saan nga agkurang ti pagilian iti suplay ti lana.
Imbinglay ni Castro nga adda negosasyon ita ti DOE para iti 440,000 barrels ti fuel malaksid pay ti 600,000 barrels ti langis a mabalin nga angkaten.
