Pormalen a naipilaan ti reklamo sadiay Office of the President ti PrimeWater Infrastructure Corporation a kukua dagiti Villar gapo iti palpak a serbisyo ti kompanya.
Ti panangipila ti kaso ket indauloan ti Bayan Muna Party-list, San Jose del Monte Consumers, ken Bacolod City Water District idiay Malacañang ita nga aldaw.
Nagpanawagan dagiti complainants kenni Presidente Ferdinand Marcos Jr. para ti madagdagos a kanselasyon dagiti amin a joint venture agreements ti kompanya kadagiti local water district ti gobierno, saan laeng idiay Bulacan nu di ket intero pagilian gapo kadagiti reklamo dagiti consumers ken uray mismo kadagiti empleyado da.
Nakalanad pay iti reklamo ti napaot a water interruption, nababa a kalidad, ken sabali ti kulay na a supply ti danum a mapagduaduaan kas saan a naalged para kadagiti consumers, malaksid pay ti nangato a singir ti kompanya nga uray pay nagalas ti serbisyo da iti tao.
Maipalagip nga immunan a dinakamat ti Palasyo a malaksid sadiay San Jose del Monte Bulacan ken Bacolod ket apektado pay ti pangit a serbisyo dagiti probinsya ti Laguna, Pangasinan, ken Bohol.
