Adu a probinsia iti Amianan a Luzon ti sumango manen iti napigsa a tudo gapu iti epekto ti nadumaduma a weather systems ditoy pagilian.
Maibasar iti 24-Hour Accumulated rainfall forecast ti state weather bureau, mabalin a makapadas iti 100 mm agingga iti 200 mm a tudo dagiti probinsia ti Cagayan, Isabela, ken Batanes.
Katupag daytoy ti napigsa agingga iti nakaro a tudo a patauden pay laeng ti Amihan ken shear line.
Manamnama a mapasaran ti kalkalainganna agingga iti napigsa a panagtudo dagiti probinsia ti Apayao, Kalinga, Mountain Province, ken Ifugao.
Posible a dagiti kasta a lugar ket makapadas iti panaglayus, nangruna dagiti nababa a lugar, ken kasta met iti panagreggaay ti daga.
Segun iti state weather bureau, mabalin nga agtultuloy ti napigsa a tudo idiay Cagayan ken Isabela agingga iti Domingo, Enero 5.
Awan met dagiti mamonmonitor a tropical cyclones wenno Low-Pressure Area (LPA) iti asideg ti teritorio ti Pilipinas, ngem ti dakes a paniempo ket gapuanan pay laeng ti agsaksaknap nga Amihan ken ti panagtitipon ti nabara nga angin manipud daya ken nalamiis nga angin manipud amianan .
Malaksid iti daytoy, epektibo ti gale warning iti igid ti baybay ti Batanes, Cagayan, pakairamanan ti Babuyan Islands, Ilocos Norte, ken Ilocos Sur gapu iti naalon a baybay, a mabalin a dumanon manipud 2.8 metro agingga iti 4.5 metro.
Maibalakad kadagiti operator dagiti babassit a bilog ken mangngalap nga agannad.
