Indauloan ti Provincial Government of La Union, babaen ti Office of the Provincial Agriculturist ti inagurasyon ken panangkararag ti Multi-Species Hatchery and Aquaculture Facility sadiay Barangay Santa Rita Central, Agoo, La Union idi Enero 16, 2025 kas panangpapigsa ti aquaculture industry ditoy probinsya.
Tarigagay daitoy a moderno nga pasilidad a mapapigsa ti produksyon ti lames, suportaran dagiti lokal a mangngalap, ken makaiyeg ti food security kasta met ti panaglago ti ekonomiya.
Nadisenyo ti hatchery a mangpataud ti tinawen a kanayunan nga tilapia fingerlings manipud 400K agingga 500K a piraso tapno masiguro ti kaadda iti nalaka a presyo.
Agserbi pay daitoy nga instrumento para iti research and training kadagiti mannalon, mangngalap, ken stakeholders iti tay-ak ti aquaculture ken makabukel kadagiti inobatibo nga teknolohiya.
Ni Governor Raphaelle Veronica “Rafy” Ortega-David ti nangidaulo ti seremonya, kakadwa dagiti opisyales ti barangay, stakeholders, ken miembro ti komunidad. Iti mensahe ti Gobernadora, impaganetget na ti kinapateg ti aquaculture para iti makawaywayas a masakbayan ti La Union.
Nagleppas ti programa babaen ti guided tour kadaitoy a pasilidad, a nangipamatmat ti inobatibo a disenyo ken operational features.
Nangipeksa met dagiti nakipaset iti pakaseknan da kadagiti oportunidad iti daitoy nga inisyatiba ken maipaay na kadagiti lokal a mangngalap ken ti industriya ti aquaculture.
Testamento iti Multi-Species Hatchery and Aquaculture Facility iti espiritu ti La Union PROBINSYAnihan, nu sadino ket ti kolaborasyon ken pagkaykaysa ti mangiturong iti progreso.
Agserbi daitoy kas senyalesa mangparang-ay ti biag dagiti coastal communities ti La Union ken mangiturong ti bisyon ti probinsya nga agbalin nga Heart of Agri-Tourism in Northern Luzon!
