LA UNION – Makumikom ita ti DSWD iti panangtukoy kadagiti residente a nakaro a naapektaran ti bagyo Ompong a maipaayan ti temporaryo a trabaho idiay Ilocos Region.
Iti pannakiuman ti Bombo Radyo kenni DSWD Regional Field Office-1 Information Officer Darwin Chan, kinunana a kalpasan a matukoy dagiti benepisyaryo ket agre-request-da iti pondo a kasapulan para ti cash for work program ti ahensya.
Agbalin a prayoridad kinunana dagiti residente a nakaro a naapektaran iti bagyo.
Kabayatanna, agap-apura kinana dagiti kameng ti DSWD iti panag-repack kadagiti relief goods ti uneg ti warehouse a masarakan iti syudad ti San Fernando gapu ta nagsasaruno iti agkidkiddaw iti tulong kadakuada manipud ti naduma-duma nga ili ti Region 1.
Sigun pay kenni Chan, umabot iti 4,000 family food packs nga agbalor iti P1.4 million ti immunan nga inwaras dagitoy.
Impanamnama met ti DSWD nga umdas iti tulong nga itedda kadagiti umili a naapektaran ti bagyo.
Iti sabali a bangir, kinuna ni NGCP-Northern Luzon Spokesperson Lilibeth Gaydowen naisimpan iti amin a kangrunaan a linya ti kuryente iti intero nga Ilocos region.
Kinumpirma met ni DPWH 1st District Engineer Emil Ganden, nga awan iti nadadael nga infrastracture projects kas kadagiti kangrunaan a kalsada ken rangtay.
Siraragsak met nga impadamag ni La Union PDRRMO Operations Officer Alvin Cruz nga agtaltalinaed a ‘zero casualty’ ti probinysa kalpasan iti idadalapus ti bagyo.
Sigun met kenni OCD Regional Center-1 Spokesperson Mike Sabado, makumikomda kaddua dagiti dadduma nga ahensya ti gobyerno nga agisagsagana iti report maipapan ti kalamidad nga iparang kenni Pangulo Rodrigo Duterte.
Kabayatanna, nagaawid metten iti kaadduan nga evacauees iti bukodda a babbalay ken makumikom dagitoy iti panangtarimaan kadagiti nadadael nga alikamen.
Gungundawayan met iti sumagmano a kakailyan ti panangala kadagiti kayo nga inyanod ti layus kadagiti igid ti baybay ken karayan tapno aramiden a sungrod wenno ilako.
In-inot metten nga agsubsubli iti normal ti kabibiag iti probinsya malaksid iti benneg ti agrikultura gapu iti kinaadu ti nadadael a ginubuay ti bagyo Ompong.
