Pinaregta ti Public Relations Society of the Philippines (PRSP) dagiti miembro da a suroten dagiti etikal a basaran ti propesyon da ken kinondenar ti panangaramat kadagiti peke nga accounts tapno mangiwaras ti saan nga umiso nga impormasyon mainaig ti panagtagikua ti Pilipinas idiay West Philippine Sea.
Daitoy ket kalpasan nga iwaragawag ni Senate Majority Leader Francis Tolentino a ti Chinese Embassy ditoy Pilipinas ket nag-hire ti maysa a lokal a kompanya tapno ag-recruit kadagiti maaw-awagan nga “keyboard warriors” para iti panangiwaras ti disinformation iti social media.
Segun iti PRSP, ti trabaho da ket papigsaen ti reputasyon dagiti kliyente ngem saan a rumbeng a maaramat daitoy tapno mangdadael iti publiko.
Mamati da iti bileg dagiti sao ken kuwento tapno buklen ti opinyon ti publiko ken kasapulan a suroten dagiti etikal a basaran dagiti aksyon da.
Impakita ni Tolentino iti maysa a Senate hearing ti kontrata a nakailanad ti koneksyon ti Chinese Embassy ken ti Makati-based marketing firm nga Infinitus Marketing Solutions Incorporated nga adda pakainaigan na kadagiti 330 a peke nga Facebook at X accounts tapno mangiwaras kadagiti saan nga umiso a damdamag.
Gapo iti daitoy ket nangibilin ti Malacañang ti imbestigasyon ken nagpaayab dagiti mamanday-linteg ti nainget a panangadal kadagiti posible a kaso kontra kadagiti mapaneknekan a karaman iti modus.
